يا صابره يا حنينه
يا صابره يا حنينه
لابسه الجمال خلخال
ف العتمه متبسمه
زي القمر لو مال
تمشي معاكي النجوم
وتغني بالموال
راحت لفين ضحكتك
والآه تهد جبال
والحزن فوق طرحتك
شاهده عليه أجيال
يا ام الحسب والنسب
والعز والأبطال
إن كان عريسك بخيل
أو مشيه كان بطال
جالك عشان الدهب
والعز والرسمال
أهو دار عليه الزمن
واتغيرت الاحوال
إزاي تقولي السماح
للي يخون عهدك
واللي بيسرق ضحكتك
إزاي يصون ودك
اللي حتديله الأمان
أوعك يكون محتال
مدي إيدين الأمل
يطلعلك الخيال
يمسح دموع الألم
والذل والأهوال
يملى غيطانك وفا
ويفرحك في الحال
يا صابره يا حنينه
لابسه الجمال خلخال
ف العتمه متبسمه
زي القمر لو مال
تمشي معاكي النجوم
وتغني بالموال
يا صابره يا حنينه
للاستماع إلى الاغنيه
لحسن شهاب
على هذا الرابط
