مواويل
أنا حلفت يمينين على بيت الندل ما انا داخل
كاتب على الباب مفقود يا داخل
يخش بين اتنين أصحاب ويداخل
السن يضحك أما السم فـ الداخل
" ع الأصل دور "
ــــــــــــــــــــــــــــــــــــــــــــــــــــ
يا رب حكمك على كل العباد ماشي
بتنزل اللي ركب وتركب الماشي
وتعز وتذل والغافل ميدراشي
الندل مهما جمع كومه ميعلاشي
تجري وتتعب وغير رزقك متلقاشي
" وعجبي "
ــــــــــــــــــــــــــــــــــــــــــــــــــــــــ
أعظم معلم يعيش العمر يتعلم
يدخل فـ باب العلم ويوقف على السلم
يعلى درجه بدرجه مايوصل آخر السلم
ياما ناس متعلمه تسألها وتبلم
وناس من غير علام تترجم وتتكلم
" عجبي "
ــــــــــــــــــــــــــــــــــــــــــــــــــــــــــــــــ
يارب علشان خاطر النبي الزين تفك الكرب وحصلي
أنا عبدك وضعيف أغراني إبليس وحصلي
أنا حتوب على المكتوب وحصلي
اسمع كلامي نظام الفن وحبابي
أنا فـي مدح النبي الكل أحبابي
لما شفت أحبابي أتاني الفرح وحصلي
ـــــــــــــــــــــــــــــــــــــــــــــــــــــــــــــــ
ناس بتبلغ أمل عند العمل وتطول
وناس بتجري من الشمس للمغرب
ليلة الأسية شرحها بيطول
وليلة الفرح تطلع شمسها مغرب
ــــــــــــــــــــــــــــــــــــــــــــــــــــــــــــــ
صعبان عليا أشوف بختي ولا اطولشي
فتلت حبل الوداد قصر ولا طالشي
يا ميت ندامه ع اللي حب ولا طالشي
خليك مع الله ولا تندم على اللي راح
اخلص ضميرك مع المولى الكريم ترتاح
لو طرت بجناح غير المكتوب ولا تطولشي
ـــــــــــــــــــــــــــــــــــــــــــــــــــــــــــــــــــــــ
يا طالب السعد من غير وعد تعمل إيه
غيرك بنا وعلى وخد من البنا إيه
تطلب من العبد هو العبد حيلته إيه
اطلب من الله هو كريم يا شاطر
خليك مع الله وعلى الناس ماتشاطر
الدهر عندي مبيعطيش للشاطر
إذا كنت شاطر وبختك مال تعمل إيه
ــــــــــــــــــــــــــــــــــــــــــــــــــــــــــــ
يا دنية الله بتذلي المليح عشان إيه
دا كان ولد عال ويقول للضيوف عشانا إيه
لما اتضعضع الحال تذمو فـ غيبته عشان إيه
قلتله ليه يا ولد من جمع الرجال معزول
قال دنيا غروره تذل السبع ويا الغول
تفنى الخلايق ولازم كل نفس تزول
أنا حلفت يمينين ع الدنيا لا اعاشر نفر ولا زول
من ودله زول على طول الزمان يشانيه
ـــــــــــــــــــــــــــــــــــــــــــــــــــــــــــــــ
يا دنيا كان ليكي صاحب زين يا خساره فتيه
طعمك كما الشهد للي تحبيه تفتيه
يا خساره على سبع كان بين الرجال فتيه
اللي تحبيه تخليه ع القصور يحاكي قام
يقعد بين الناس صاحب كلمه ومقام
واللي كرهتيه تكحتيله تحت الأراضي قام
ولو شرده اتعدل قام فـ أسرع حال فتيه
ــــــــــــــــــــــــــــــــــــــــــــــــــــــــــــــــــــــ
عيان يا طبيب ولا حدش يقول عوافيه
زمن الشباب راح واتبهدلت عوافيه
سبع البلد مات لما كلب البلد عوافيه
إيه اللي كايدني غير المعيره واللوم
محاسن الوجه اتغيرت والبها واللون
ولا تفرحوش يا عوازل كل واحد وليه يوم
بكره يجي يوم وترجع للأصيل عوافيه
ــــــــــــــــــــــــــــــــــــــــــــــــــــــــــــــ
عليك يا جميل في الغرب دلوني
زادو همومي بكل الطرق دلوني
لأصحن الصب للمكتوب دلوني
آه لو املكك يا جميل لاخلي الهوى ينساك
أسكنك قصر عالي علينا البيبان تنساك
بيمين ما أنساك لو ع القبر دلوني
ــــــــــــــــــــــــــــــــــــــــــــــــــــــــــــــــــ
دنيا غروره وعكصه
زي سمك المداور
كل زول تعطيله رقصه
وساعة السفر لم تشاور
ــــــــــــــــــــــــــــــــــــــــــــ
دنيا عتبه الأساس
يهدها اللي بناها
قليل المال تكرهه الناس
أغلب المحبه وجاهه
ــــــــــــــــــــــــــــــــــــــــ
ليه يا زماني تاكلني
بعت العمامه والخليقه
أروح للوحوشه تاكلني
ولا عوزتي للخليقه
ـــــــــــــــــــــــــــــــــــــ
ورا الأيام قلبنا وعدلنا
والدمع ع الخد ساحت
لما قربنا ناخد عدلنا
لقينا الأيام ولت وراحت
ـــــــــــــــــــــــــــــــــــــــ
تاريها الدراهم بتنفع
تجيب بل ويا غنيمه
الصاحب اللي ما ينفع
البعد عنه غنيمه
ــــــــــــــــــــــــــــــــــ
شرق بلدنا بلد سيح
والندل ماشي ورانا
مش عيب كراسي التماسيح
تقعد عليها الورانا
ـــــــــــــــــــــــــــــــــ
دنيا علينا تربت
انظر بعينك راعيها
العنز لما تربت
ما نطحت إلا راعيها
ـــــــــــــــــــــــــــــــــــــــ
قال يا طبيبي قوم الحق
هاتلي الدوا الموافق
ياما ناس بتعرف الحق
ولجل الضروره توافق
ـــــــــــــــــــــــــــــــــــــــــــــــ
الصاحب الزين يتحط فـ الجيب
وتفج منه روايح
الندل لما يبدي بالعيب
ما يتجي منه غير الفضايح
ـــــــــــــــــــــــــــــــــــــــــــــــــــ
أمانه يا طبيب ماعندك طب يسندني
على قلة ضهر حنين في ميلة الحمل يسندني
لما كان معاي مال كان مالي بيسندني
كفايه اللي أتى من الزمان كفاني
صاحبت إنسان قلت عن الناس كفاني
ميل كفاني وعمل نفسه بيسندني
ـــــــــــــــــــــــــــــــــــــــــــــــــــــــــــــ
عاكس معانا الدهر فاضي النبل فـ المقدور
وفضلت أبكي واصب الدمع فـ المقدور
أوعى تقول الحذر حيمنع المقدور
يوم ما كتبو الغلابه أول سطر كنت آنا
زمني طحني سقاني الكاس كطحن البن في الهانه
دورت لفيت ملقيتش سعد ولا هنا
بعد الإهانه يا رب اللطف ف المقدور
ــــــــــــــــــــــــــــــــــــــــــــــــــــــــــــــــ
يا طبيب في الزمن شفنا العجب وجابان
تعبان يا طبيب من مشي الردي وجبان
صرفت مالي من مخزني وجبان
أهل الكرم رحلو وسكنو التراب وجبان
رقدت عيان ولزمت الفراش وأساد
اتبع ابن الكرام متقولشي عبد ولا ساد
فقير وسخي اليد أحسن من غني وجبان
ـــــــــــــــــــــــــــــــــــــــــــــــــــــــــــ
شوف البخت لما مال والمايل صبح معدول
بإيدي كتبت الألف وقع القلم ماعدول
ماكنت خالي يا قلبي وإيه شبكك مع دول
نكرو ودادك ونسيو الود وجميلك
تمشي مع الردي يوم ينطفي اللون وجميلك
مهما طعمت الخسيس بالشهد وجميلك
يروح جميلك ولا ينفع وداد مع دول
ــــــــــــــــــــــــــــــــــــــــــــــــــــــــــ
زمن الشباب راح بعد الغندره ما دريت
والشعر لاسود شاب من بعد السواد ما دريت
رحلو الحبايب ووحدي بقيت لكن ما دريت
أستاهل أنا اللي فـ نعمتي فرطت
صرفت مالي دهب وبإيدي أنا فرطت
وفـ روحي فرطت وخدمت الخسيس ما دريت
ـــــــــــــــــــــــــــــــــــــــــــــــــــ
