جربت قبل كدة ؟

أنا آسف..

يمكن ما شرحتش قصدي ايه

أقصد، جربت تبدأ يومك الصبح

لما تصحى من النوم

وانت لسه على السرير

بأنك تقول

النهاردة ان شاء الله هيبقى يوم جميل

وتبتسم

وتحس انه فعلاً هيبقى يوم جميل

وتقول:

انا فرحان

جربت قبل كدة ؟

أنا آسف، برده تقريباً لسه ما وصلتلكش قصدي

جربت تخرج من البيت، وجواك احساس ان كل حاجة هتمشي زي مانت تحب

احساس، بدون أي شك، ولو سمعت صوتك الداخلي كعادته بيحاول يشكك في كدة

تتجاهله بابتسامة بسيطة..

وتسيبه يتكلم زي ماهو عايز..

عارف انك هتلاقي المواصلة الي عايز تركبها،

ممكن المترو نفسه يستنى ويفضل فاتح بابه لحد ما انت تركب، على غير العادة – بتحصل فعلاً وحصلت قدامي كذا مرة- ، لما وقتها الناس تقول هو بايظ ولا ايه

لو خارج عشان امتحان، عارف ان يومك جميل، إزاي، ما تعرفش

بس تعرف ان كل حاجة، وكل الناس هتقف معاك، بدون سبب صريح

واحد اعرفه، كان لسه ما لحقش يخلص المادة الي بيذاكرها

راح قدام الكلية بدري يوم الامتحان

لقى واحد ما يعرفوش، لما شافه بيذاكر اوي في الكتاب

قاله بص يا كابتن

وفتحله كتاب اسمه “المرشد”، وجاب امتحان سنة سابقة، وقاله الامتحان النهاردة

هو ده بالظبط

بترتيب الأسأله

وسابه ومشي

الحكاية دي على فكرة حقيقة

حصلت بجد والله

وفعلاً دخل الامتحان لقى الامتحان بالظبط زي ما الشخص ده قاله

يمكن عشان كان عارف ان يومه جميل بإذن الله

الجميل، واللي مش غريب

ان حالاً وانا بكتب نفس الموضوع ده

جه اعلان سيراميكا فينيسيا، اللي بيبدأ بـ:

امتى هتبتدي كل يوم وكأنه احلى يوم

لما تخرج من البيت

وانت حاسس وعارف ان الكون كله هيقف معاك

ولو حصل وافتكرت انك نسيت حاجة مهمة في البيت ومش هتعرف ترجع

عارف ان هتحصل أي حاجة ان شاء الله

تخليك مش محتاجها

حتى لو فلوس، انت واثق في ان يومك بإذن الله، يومك جميل

هتلاقي أي حد يعرفك يوصلك

أو حتى ما يعرفكش !

وبرده الحكاية دي حصلت فعلاً وأكتر من مرة

شخص أعرفه، لما الناس بتمشي معاه

وتحصل معاه أحداث جميلة

الناس بتقول : ماشية معاك

محظوظ

بركة دعاء الوالدين !

الغريبة انه ما بيعترفش بالحظ

وما يعرفش مين دي اللي ماشيه معاه !

وأكيد بركة دعاء الوالدين ليها دور

لكن هو معتقد أكتر،

ان كل حاجة حواليه بتحبه

عشان هو بيحب كل حاجة حواليه

ان يومه جميل

عشان هو ابتداه بـ” ان شاء الله النهاردة هيبقى يوم جميل”، حتى وهو مروح البيت

بيفتح البوابة

ممكن المفاتيح ما تقعش

وتتعلق بشكل غريب في الشنطة عشان ما تقعش

ممكن وقتها تبتسم

وتضحك

وتقول، الحمد لله

النهاردة، كان يوم جميل

مش عايز منك، لأ

أنت ما تعوزش من نفسك

غير انك تعلق ورقة قدام سريرك

تفكرك أول ما تصحى

انك تقول الجملة دي

وتحسها بكل معانيها

“النهاردة ان شاء الله هيبقى يوم جميل”

“أنا فرحان”

وياريت، ياريت بعد ما تعمل كدة

تفكر انت هتعمل ايه النهاردة في يومك، وحتى لو هتحط الخطوط العريضة بس

لكن عشان تشوف يومك ان شاء الله، في الأحداث دي

هيبقى بإذن الله

جميل ازاي

تحياتي، وأتمنى ان كل يوم من أيامك الجاية ان شاء الله

يوم جميل