كفر حجازى

حيوا معانا الحزب الوطنى
حيوا معانا الناس الفاهمه حيوا معانا الحزب الوطنى
كل الدنيا يقولوا دى كارثة هما يقولوا دا عرس لبلدى
راجل يكسب بعد سقوطه بالصناديق الفاضية وعجبى
والكسبان وبقدرة قادر قالوا داساقط قوى من بدرى
حيوا معانا الحزب الوطنى
فضلوا يقولوا فى كل مناسبة إحنا بتوع العدل ياناس
روحوا وقولوا بإى طريقة واختاروا نوابكو بإحساس
لما الشعب إختار نوابه اللى يشيلوا الدين عالراس
ضربوا الشعب وزوروا رأيه داسوا عالشعب بكل مداس
حيوا معانا الحزب الوطنى
الصناديق الفاضية مالوها بالتزوير وبحطه يابطه
كل شاشات العالم قالت فين الحق وفين الشرطه
عمك عز وعمك صفوت صرخوا وقالوا إحنا السلطه
بالحرية والملوخية واشتراكية جابولنا الجلطه
حيوا معانا الحزب الوطنى
مجلس شعب ياخويا مزور كل الدنيا قالت باطل
شفت الحاج وشفت الحاجة شفت شباب الحزب الفاشل
باعوا البانجو فى قلب اللجنة ضربوا كل شريف ومناضل
بالبلطجه وبناس مشرية ناس ملعونه بكل محافل
حيوا معانا الحزب الوطنى
شفت فى مره حاميها ياخويا فى يوم وفى ليله بقى حراميها
رجل البر ورجل التقوى زور هو وهيثم فيها
سعد ( أفشهم) جوه اللجنه وقالوا ياحاج حرام خليها
الصناديق والله هاتشهد قدام ربك روح فضيها
حيوا معانا الحزب الوطنى
ياحكام البلد انكسفوا مش هاتكونا زى قاروون
رب الكون أعطاله خزاين علشان يشكر رب الكون
الملعون كان فاكر إنه يقدر يقتل موسى وهاروون
ربك خسف الأرض بعدله وخلى قارون فى القاع مسجون
حيوا معانا الحزب الوطنى
فاشل عاطل بلطجى زرزر الملاعين خلوها نهيبه
لما رمالهم لقمه وصفر هزوا وهتفوا وقالوا ياوهيبــه
إحنا بتوع المال والسلطه إحنا الوطنى وانتم خيبه
إسلام إيه يابنى انت وهو غوروا فى داهيه جاتكو مصيبه
حيوا معانا الناس الفاهمه حيوا معانا الحزب الوطنى
سنين بيقولوا هانعمل نهضه لجل العدل يسود فى بلدنا
طوف بعيونك يالا يامصرى تلقى مصايب حزب حكمنا
باعوا الغاز لصهاينه يابلدى خلوا الأزمه وسط وطنا
حتى الزرع ماعدش يكفى علشان ياكل نص عيالنا
حيوا معانا الحزب الوطنى
شفت فى كل تاريخنا يامصرى سعر السكر خلوه كام
حتى فى ايام ثورة يوليو يوم مالسكر كان فونضام
كنا بنشترى بالتربيعه قصب السكر بالاقدام
لما الحزب الوطنى وكسنا خلى الشعب فى أزمته صام
حيوا معانا الحزب الوطنى
إنت مفكر إن الوطنى مش هو أساس الإشتراكية
إرفع راسك يابنى وكمل بالهتافات خليها قوية
إهتف يالا وقول من قلبك سأف وارقص ياحرية
إحنا بتوع الحزب الوطنى إحنا بتوع فتحى يافنديه
حيوا معانا الحزب الوطنى
ياهل الذمة وأهل الدين إيه اللى حصل للامه
ليه الناس ماعدوش عاوزين الإسلام ويزيحوا الغمه
كل مااهل الحل يحاولوا لجل ينورا كل الضلمه
يلقوا عقارب زى تعالب سامه وهى صاحيه ونايمه
حيوا معانا الحزب الوطنى
أنا مش عارف ليه فيه ناس غاوية تخون وتبيع ضمايرها
علشان لقمه حرام يتقاولوا مع شياطين بتخون فى وطنها
كل ماأمة طه تحاول إن تسود الدنيا بدينها
حالوا عليها الخونه أفاعى تسمم كل طريق لولادها
حيوا معانا الحزب الوطنى
ناس ملعونه وناس مسمومه ناس بتبيع أعراضها وتاكل
تشهد زور وتحارب دينها تاكل سحت طريقها مشاكل
ناس بتحارب كل تاريخنا ناس بتعاند فينا وتجادل
ياربنا إفضح عمايلهم واجعل كيدهم دايما فاشل
حيوا معانا الناس الفاهمه حيوا معانا الحزب الواطى
شفتى يابلدى رجال الوطنى حالوا علينا عشانك إيه
حالوا علينا الطغمه الفاسده سبوا الدين واتكاتروا عليه
مش عاوزين الإسلام يحكم ولا رجالته تفكر فيه
عاوزين شعب ينام ويزور علشان ينهبوا كل ماليه
حيوا معانا الحزب الوطنى
قومى ياأمه وعلى الصوت الإسلام هو الحل
إصحى ياأمه كفاية سكوت القرآن شمس وظل
دوسى ياأمه الباطل وانتى رافعه لراسك فوق الكل
والقرآن لازم يحكمنا كل حياتنا تصبح فل[1]
[1]قلت هذه القصيدة بعد تزوير إنتخابات مجلس الشعب 2010م