تانوف

بصراحة انا مش عارف ابدا منين لان الواحد تايه فى بحر من الافكار لكن هابدا من تحية للشعب المصرى العظيم الذى استطاع ان يحدث تغيير شامل بطريقة سلمية محترمة اذهلت العالم واستطعنا نحن المصريون خارج الوطن ان نرفع رؤؤسنا ونقول احنا مصريون علما بان الواحد مكانش مستوعب اللى بيحصل لان الواحد كان فاقد الامل بان فيه حاجة ممكن تتغير فى البلد دى لان لما كنت بشوف تصرفات المصريين مع بعض وطبعا ده ما بيحصلش الا خارج مصر كنت بقول مفيش فايدة وسامحونى ان كنت بقول كده وطبعا انا غيرت رايى دلوقتى مية وتمانين درجة لانى اتاكدت بعد الثورة ان اخلاق المصريين اللى كنا كلنا بنشوفها كانت قشور من برة واتعمد النظام السابق انه يظهرها ودفن جوه المصريين كل الخير والمجدعة والرجولة عشان يقدر يستمرفى التربع فى حكم هذا الشعب ولكن ان الاوان ان الشعب ده ينفض الغبار وكل القشور والسلبيات ويطلع الحاجات الكويسة اللى جواه, والواحد لما كان بيتابع التلفزيون لما بدات احتجاجات خمسة وعشرين يناير شوفت شباب وشعب بيلهم الشعوب التانية شوفت شباب متحضر شوفت ناس بتهتف وناس بتقف ما بين الامن المركزى والشباب عشان يمنعو العنف ما بين الطرفين وشباب بتوزع الاكل والميا وشباب بتنظف مكان اكلها ولما حصل من هجوم اللى بيسموهم مؤيدين لكن زى ما انتو عارفين هما بلطجية كانو بيردو من منطق الدفاع عن النفس وكمان موضوع اللجان الشعبية كانت حاجة عظيمة كان كل واحد ومراته وعياله بالعصى والشوم والسكاكين قاعدين قدام البيوت والحوارى والعمارات والمساجد ولما يلاقو حد غريب يثبتوه وينادو على بعض والله يا جماعة دى ارادة شعب عايز الحرية والحاجات دى المفروض تتوثق وعشان كده كان النظام السابق شغال بايده وسنانه واعلامه عشان يموت الشعب ده ويدفن ارادته حتى السينما ساهمت فى كده كانت عايزه تظهر الشعب ده فى خيابة وبلادة وتظهر الشباب فى استهتار وتهريج وتظهر الشعب ده بانه عمره ما هايثور على اوضاعه والشباب ده اهم حاجة فى اهتماماته البانجو والحشيش ومعاكسة البنات والتحرش بيهم وانا ماقولتش انه مفيش ناس بتعمل كده لكن الشباب دول اثبتو انه لو كانت فيه حاجة زى كده فهى شى عارض ومؤقت,لكن الحمد لله الشعب فاق من كل اللى كان بيدبره النظام عشان يحط الشعب ده فى المربع ده ومايطلعش منه وعمل ثورة على الاوضاع والشباب طلع فاهم ودماعه حلوة ولمابيتكلمو افكارهم مرتبة وبيقدرو يقولو كل مطالبهم فى جمل وكلمات بسيطةيعنى من الاخر ما يتخافش عليهم والحمد لله الواحد شاف اليوم ده لانى كنت خايف اموت ولسه حسنى مبارك ريس والحمد لله شوفنا اليوم اللى فيه مصر بتتغير بجد.