أم دينار

مبروك عليكى النصر
*****
أشعار الدكتور صبرى إسماعيل
*****
ساعة الرحيل زغردت----أرض العروبة مصر
والشعب نادى البلد-------مبروك عليكى النصر
ولّى الكابوس وانتهى---------واليُسر بعد العُسر
******
والثورة طالعة بشرف------بِتهنّى فى الجماهير
فى كل أرض الوطن--------وفى مدان التحرير
مبروك شباب مصرنا-----------ياثورة التنوير
******
الله أكبر نَصر------------واتحرروا الملايين
والثورة كانت قدر--------ثارت على الظالمين
داالمجد مشتاق لكم------------يأمّة الصابرين
*******
إبنك يامصر انتصر--------واعلن لكل الكون
سلميّة بيها هتف-----------وحتّى مهما يكون
يامصر قومى افرحى---ياام الشباب والصون
******
بإيديكوا نبنى البلد-----------ونحقق الأحلام
سنين عِجاف انتهت--------بصّوا سوا لقدّام
وادعوا يكون جنبكم-----------الواحد العلاّم
الرحيل
*****
أشعار الدكتور صبرى إسماعيل
****
فى المظاهرة الشعب أعلن كِلمته
الرئيس الطاغى يمشى وزمرته
واللّى طارح عندنا يبقى لِنا
وابن البلد دى يبقى سيّد سلطته
*****
دا الشعب أعلن {يلاّ غور ياديكتاتور}
إنت وجميع اللّى نَهب مصر العبور
واللّى سَرق م الشعب حِلمه وضِحكته
صفوت وعزّ وأسرتك وحبيب سرور
*****
الشعب يِعرق وانت تِسرق مليارات!
مايهمكاش الأمّة تِجرى للممات
ولا هزّ فيك اللى غرق واللّى اتحرق
ولا ألف صرخة تِنطلق فوق الشاشات
*****
ولا دمع جارى من عيون الفلاّحين
ولا صرخة العمّال فى بلد الشقيانين
ولا دعوة المظلوم تِطالب ربّها
يرحمنا منّك { رددوا وقولوا آمين}
*****
إرحل دا كلّ الشعب طالبك بالرحيل
أحمد ومينا وعمّ جِرجس وإسماعيل
دا النيل بيصرخ والهرم صارخ معاه
حتى البحور والأرض تصرخ بالرحيل