الاحراز

إسمعوا اما احكيلكم حدوتة
ع الملتوتة
راجل فقير طافح الكوتة
خلـِّف ولدين
,,
الشخص ده كان صرماتى
يشقى يوماتى
وطول النهار يبقى يهاتى
بينهم لـ اتنين
,,
فيهم ولد واعى وناصح
إسمه صالح
وواد عبيط ولاهوش فالح
إسمه شعبان
,,
لما لقى شعبان ساهى
دايما لاهى
وخيبته جات خيبه إلهى
خـدُه فى الدكـَّان
,,
عشان يناولـُه ويساعده
ويقعد عنده
و م البـُلـَغ ياخـُد وعده
بين المراكيب
,,
ويقول له خـُد ودِّى الجزمادى
لعبده الهادى
وخـُش رقـَّع دى قصادى
بس اوعى تغيب
,,
يحب صالح ويبوسه
وكل فلوسه
راحت عليه وعلى دروسه
وتملـّى يجيب
,,
كتب مدارس ودفاتر
عال ومساطر
ويقول له يا واد خلـَّيك شاطر
خايف لا تخيب
,,
ودَّاه مدارس يتعلم
يا سلام سلـّم
الواد طلع عال متكلـّم
شاطر ونبيه
,,
ومن شطارته طلع دكتور
شاطر مشهور
أبوه فـِرح بقى به مسرور
ماهو مربـّيه
,,
لكن طـِلعت عينـُه قوية
بلا حِـنـّيـة
نـكـَر حقوق التربية
ونسى المعروف
,,
يقوم جميع الناس يلوموه
على ترك أبوه
ويشتموه ويذموه
ويقولوا خروف
,,
أبوه يقول له الجوع يابنى
كركب بطنى
يقول له روح يا شيخ سيبنى
إتوفى وموت
,,
روح إنـْدفـَن دا انت عاررنى
ومحيـّرنى
وفى العيادة تيجى تزورنى
خـُد بالشلـّوت
,,
أبوه يقول له عيب يابنى
إنت بتضربنى ؟
الله يسامحك عود يابنى
أنا مـُش زعلان
,,
يقوم يقول له أنا مش بضحكلك
شعبان شكلك
روح له هناك تاكلـُه وياكلك
بلا شغل جنان
,,
فـ راح لشعبان وحكاله
ع اللى جراله
قال له طيب يابا وماله
أنا ليك خـدام
,,
مدام ما عادش لك قوَّة
أقعد جـُوَّه
أنا جدع لسه فتوة
مش إبن حرام
,,
جميع لوازمك هاقضيها
وهاقوم بيها
ما دام أخويا طلع فيها
يغنيها الله
,,
آدى الأدب والتربية
والحِـنـّيـة
أحسن ما نبقى أفندية
من الصنف اياه