الدوار
الـــــــــــــــــــــــــــــــــــــــدوار
فين داك الدوار
وفين دوك الكديات
تبدل الزمان ودار
الحباب كاع مشات
البارح كنت تم سارح
بين الذفلة وريحت النوار
مع الحاج وبوعزة والصالح
ناسين الهم ونلعبو فالديار
شحال كانت الدنيا زاهية بعيني
لا صداع لا خصومة لا غيار
نمضغ فالحمايضة عراشها تغبيني
وناصب فخي للطيار
كل مرة لهاي السراح يجليني
ونكول هذا فراييخ غدار
كنت نفرح للصيف واخا بالحر يجيني
ولبرد الليالي تلكاني صبار
نهار السوق كنت نرافق بويا حنيني
باش نشري قريشلة وكويرات صغار
حيث كان كلشي موجود
نعايم مولانا كلها بركة وسعود
مالك يا دوار حالك هكدا صار
مابقى فيك غير العجاج والغبار
فين مواليك والصابة لي كانت تجيك
فين عمارات رجال ونسا تغني ليك
والرويعي باللامة يشهد ليك
الله الله عليك ادوار
على من ترمي العار
ملي وللا فيك لكنفوذ خارج بنهار
والثعلب دايرة فمراحك غار
فين خيلك فين لصوار
فين السواني فين لبيار
فين الدلى والركاوي لكبار
فين الرحى وفين الفخار
فين الكوادم فين المنشار
الله الله عليك ادوار
الله الله عليك أدوار..
ChradQui Mohamed
