ايام الغربة
تعلم .. اتخرج .. بيدور على شغل .. اشتغل بمرتب قليل .. مش مشكلة اتمرمط وانت صغير .. اشتغل حاجة بعيد عن اللى درسها .. هو حد لاقى شغل .. اشتغل شغل تانى بمرتب اعلى ومرمطة اقل شوية .. عايز يخطب ويتجوز .. مفيش فلوس .. مكسوف ياخد فلوس من اهله وهو شحط كده .. دور على شغل بره مصر .. بيحلم بالسفر .. دور على النت وفى الجرايد .. يبعت السى فى هنا وهنا وهنا يمكن تلطش فى واحدة .. يوصى قرايبه بره مصر يشوفوله شغل .. الدنيا ملطشة .. جاله ايميل من الخليج .. مبروك هتشتغل معانا .. يا بركة دعاكى ياما .. انا مسافر ياناس .. فرحان انه حيطير .. ويحل ازمته .. رتب شنطته .. اشوف وشكم بخير .. خلى بالك من نفسك يابنى .. تقولها امه بصوت مبحوح .. والدمعة تهرب منها .. ياخدها بالحضن .. ويلف ويركب طيارته .. مصر من فوق حلوة برضه .. ينزل ارض البلد برجله اليمين .. يتفرج على البلد فى السكة .. مبانى ازاز وشوارع نضيفة .. والله والبلية لعبت والحظ ابتسم اخيرا .. راح السكن ونام .. ولسه فى دماغه الاحلام .. صحى من نومه .. واستعنا على الشقا بالله .. روح تعالى ايش تسوى .. سيدا صديج ومنى منى .. هنود وبنجال وفلبيين .. مش فاهم بتقولوا ايه يا مجانين .. ريحيتكوا تموت يا معفنين ..ومعاملة زفت الطين .. طب وبعدين .. مش ده اللى شافه فى احلامه .. اه فى فلوس بس مش زى ما كان حاسبها .. يقبض يبعت فى مكتب التحويل .. محدش معاه وهو فرحان ولا زعلان .. محدش جنبه وهو مبسوط ولا تعبان ..بقى يعاتب ظروف بلده على غربته .. اهله وصحابه وكل تفاصيل بلده وحشته .. فضل يعد الايام عشان ينزل اجازة .. شهر ورا شهر .. بقى يركن كل مشاعره على الرف .. مهو مش هيبقى فى غربة وكمان بيشتكى .. اتعود على الحياة الجديدة .. يشتغل يروح يفتح النت ينام يصحى يشتغل .. بقى زى الالة .. ضحكته وحزنه بيتحكم فيهم .. كل حاجة فيه شعاله بسيستم .. بقى واحد تانى هو مش عارفه .. سنة ورا سنة .. فى بلده كمان نسيوه .. رجعلهم فى اجازة قالهم وحشتونى .. وانت كمان جبتلنا ايه معاك .. الناس مش هما الناس .. هما اتغيروا ولا الغربة غيرتنى .. ايه يا بلدى هو انا مش واحشك زى مانتى وحشانى .. بقى مش طايق القعدة فى بلده رغم عشقه لها .. وعايز يرجع لغربته اللى كارها .. ويبقى قدامه حل من اتنين .. يا يعمل اللى كان متغرب عشانه .. ويرجع يتأقلم تانى على وضع بلده من اول وجديد .. وهيتعود والناس هتتعود .. هيرجع بلده ويستقر بس احسن حالا من الاول .. وتكون غربته ذكرى يحكيها لولاده واللى شافه منها واللى عملته فى حياته.. يا تبقى غربته هى وطنه .. واخد مراته فى ايده .. ولاده معاهم جنسيتين .. يشيل علمها فى ماتشات الكورة .. ويتابع اخبار بلده من بعيد .. وتبقى بلاده ذكرى يحكيها لولاده واللى شافه
