سنهور البحرية

فرحة
@@@
{{{{{ رسالتي يا ماما }}}}}
........... { فرحة } ..............
بكتب ليكي رسالتي الإولى
رغم ان انا مكسوفه خجولة
إني فارقتك
قولي سامحتك ياجمل{فرحه}
كل جنايني هتصبح طارحة
وهلبس طارحة...وهبقى عروسه
أنا ف الجنة
سر دعاكي وكنت أتمنى
تسرحي شعري برمش عنيك
تفرحي بيا ... وأفرح بيك
واكبر بين أهلي و جيراني
وازرع ورد ف كل زماني
كل أماني
حلمت انا بيها ... راح تلاقيها
ف جيب الشنطة
حتى الوردة ... دي غالية عليا
جاتني هديه ف عيد ميلادي
م الواد شادي
إبن جارتنا الست روقية
قبل ما اشوف الموت بعنيا ...راكب قطر
كنت بحس انه بيكتبلي ... اخر سطر
كنت بحس انه بيوعدني ... بأخر فجر
ناوي الغدر ... لفصلي دا كله
كنت بقوله ....... بلاش تتقدم
اصرخ والطم
وانا بتندم
إني مشيت اليوم مدرستي
حتى عروستي
داسها القطر
رغم ان انا كنت بخليها تصلي الفجر
إوعي تصدقي حد يقولك
{فرحة } دي ماتت
لسا ما متش
بس ما كنتش ... قادرة اتكلم
وانا بتألم
وانتي دموعك سيل على خدي
لسا بشوف صورتك ادامي
انتي وبابا وخالي وجدي
عمي وستي
ومصر بحالها بتبكي عليا
وانا فرحانه
لما سمعت الشيخ بيقولك
{فرحة} أمانه
وخدها صاحبها
عارفه يا ماما برغم جمالك
رغم الحب اللي ف احضانك
ربنا ارحم منك انتي
يالا حبيبتي ... يأجمل ماما
نوري شمعك ... امسحي دمعك
قولي لكل جيرانك ....{فرحة}
لابسه الطرحة
فوق ف الجنة
وبتتهنى
وبتتمنى ... النصر لمصر
.......... { فرحة } ...........
يا ماما فوق ف الجنة... عايشه ف قصر
@@@@@
رسالة فرحة
من شهداء قطار اسيوط
بقلم// ضياء الإدريسي