ما يحكمشى ل "محمد عبد العزيز"
يا جماعة بصراحة أنا تعبت وخلاص ما بقتش قادر أفتح التليفزيون اللى بقى عامل زى صفحة الوفيات، الناس بتموت بس، كل يوم عمارات بتقع وقطارات بتتقلب لدرجه إنى حاسس إن الشعب المصرى بينقرض خلاص، والحل حاجة من اتنين يا نحافظ على نفسنا بنفسنا أو.. .. .. .. .. نحافظ على نفسنا بنفسنا برضه ما هو إحنا لازم نعترف أننا بلا حكومة وبلا قيادة، تخيل نفسك فى عربية ماشية على سرعة 250 كيلومترا فى الساعة ومن غير سواق.. يبقى الحل إيه؟ برافو عليك نحافظ على نفسنا بنفسنا. بس فيه ناس ولاد حلال قالوا لى إن فيه حكومة اليومين دول هى اللى سايقة البلد قلت أتكلم معاهم يمكن نلاقى حل فى اللى إحنا فيه ده.
• السيد المحترم وزير النقل.. صباح الفل.. فينك مش باين؟ متدارى بعد الحادثة ولا تقلان علينا؟ ليك حق ما أنت بقيت أشهر من نجوم هوليود واسمك بيتقال طول الوقت وفى كل مكان.. راديو وتليفزيون وجرايد لأ ده كمان السينما ما نسيتش سيادتك لأنى أكيد فيلم «ساعه ونص» اللى القطر اتقلب فيه وكل الأبطال اللى فيه ماتوا كان مستوحى من إبداعات سكك حديد مصر، بس أنا عندى اقتراح لسيادتك لو حاز القبول يمكن ننقذ أرواح كتيرة، إحنا نلغى السكك الحديدية خالص وده مش لعيب فى إدارة سيادتك لا سمح الله، لأ ده لأن العيب فى الحديد أو فى الركاب إنما سيادتك والحزب بتاع سيادتك زى الفل، بعد ما نلغى السكك الحديدية نعمم فكرة الطفطف وأهو شبه القطر برضه وسمعته كويسة وعمره ما اتقلب ولا موّت حد بس على يد سيادتكم وسياستكم الرشيدة الله أعلم.
«اللهم ارحم كل من توفى فى هذه الحوادث وأسكنه فسيح جناتك يا رب العالمين».
• السيد الأستاذ وزير الإسكان نصيحة من أخ، حاول تفهم الناس أن موضوع العمارات اللى بتقع دى مش صدفة دى خطه الإخوان المدروسة لإزالة كل ماله علاقة بالنظام السابق وأن الخطة دى بدأت فى الإسكندرية وقريبا ستعمم فى باقى المحافظات والنظام الحالى هيوفر للجميع خيم وبطاطين والدنيا هتبقى نعنااااع.
«اللهم ارحم كل من توفى فى منزله وهو آمن وأسكنه فسيح جناتك يا رب العالمين».
• السيد الدكتور وزير الصحة.. إزى الصحة؟ على الله تكون بخير.. عايز أقولك مصر كلها بتدعيلك جاااامد عشان اللى عملته فى حادثة القطر وكل الناس بتشكرك على التجهيزات اللى أنقذت ناس كتير من الموت وخصوصا الإسعاف الطائر الذى لم أكن أعرف أنه قد تم تطبيقه فى مصر ده غير سيارات الإسعاف اللى كانت موجودة فى مكان الحادث بالهبل ومن قبل وقوعه أصلا ولم أستطع أن أحبس دموعى من سعادتى المفرطة ببلدى وما يحدث فيه من إنجازات ونهضة فاقت كل التوقعات، توافر الأدوية وتجهيز المستشفيات على أعلى مستوى وعاجبنى أوى تنسيق سيادتك مع باقى الوزارات يعنى وزاره الإسكان تقع لها عمارة رجالة سعادتك موجودين وزارة النقل يتقلب لها قطر رجالة سعادتك موجودين.
سيادة الوزير والله ما قادر أكذب أكتر من كده بس وحياه أغلى حاجة عندك عيش وسيبنا نعيش واعترف إنك مش قدها وسيبها ووالله هنحبك وندعيلك بجد.
«اللهم ارحم كل من توفى لنقص الدواء أو التقصير فى إنقاذه وأسكنه فسيح جناتك يا رب العالمين».
ولا أراكم الله مكروها فى وزارة لديكم
