مناديل ورق .....كلمات محمد الصفتى
مناديل ورق.. بابيعها في إشارة ونفق
وبابيع معاها حق عمري اللي اتسرق
مناديل ورق..تمسح على جبينكو العرق
لكنّها الحبل اللي بيه مستقبلي الجاي اتشنق
مناديل ورق..
بتبصّ لي من فوق لتحت كأنّي أتفه م العدم
النظرة دي لو كنت إبنك كت حتبقى دموع ودم
قافل إزازك زي قلبك وف عينيك منّي قلق
جرّب تشوف ابنك مكاني وبصّ تاني إيه فرق
مناديل ورق..
أنا عمري مااخترت الشوارع تبقى بيتي ومطرحي
كان ممكن ابقى ف حضن بيتك وابنك انت مطرحي
أنا عمري ماكتبت الحكاية لا ف خبر ولا مبتدأ
لكن وانا المُهر الصغيّر فجأة صِرت حصان سبق
مناديل ورق..
إيّاك تكون فاكر شفقتك هي حقّي في الحياة
أنا حقّي حيكون كلمتي لآخر طريقي ومنتهاه
ربّي وربّك قالها عالية إللي ليّه معاك ده حقّ
ولو هاموت مش هانسى حقّي ولا امسحه بمناديل ورق
مناديل ورق..
كلمات محمد الصفتي
