برطباط الجبل

((( مطمِّن جداً )))
ـــــــــــــــــــــــــــــ
مطمّن جداً مطمّن
مش متهيألي وبخمّن
وف بطني شوال بطيخ صيفي !!!
الجاي أكيد هايكون أحسن
ف السكة أنا عارف فيه ياما ....
... عصابة .... ديابه ... وهجَّامه
وكلامهم واضح بيقولوا :
إحنا إللي بنعزل ونعيِّن !!!
تخطيط شغال بالوردية !!!
فرعون ف أحلامه الوردية
وخداه حساباته الأرضية
وبيحلم يحكم يتسلطن
ساعات بيسايس ويداهن
وشويه بينصب ف كماين
ع الوقت بيعلب ويراهن
ف الوقت بيلعب ويفنِّن !!!
مش عايز يفهم .... مش عايز
مبقاش ( المارد ) ف قزايز !!!
( المارد ) فارد مش عاجز
ولاتاني ف قمقم راح يسكن
فوق بقي م الحلم اللي اتبّخر
الوقت خلاص بقي متأخر
الشعب هايحكم ويقرر
دورك دلوقتي إنك تركن
مطمّن جداً مطمّن
مش متهيألي وبخمّن
وف بطني شوال بطيخ صيفي !!!
الجاي أكيد هايكون أحسن