سفلاق

فكك منى ياعم الحج
دى دماغنا بقت تعبانه
وكلام طالع وكلام نازل
والدنيا على طول خربانه
مره طالعلى وزير متأنزح
زنه علينا زى الدبانه
قال بيقولك فيه تغيير
بكره الناس هتكون فرحانه
والبيوت بالخير مليانه
والعجين يملى العجانه
اهدا يا عم اهدا شويه
دى دماغكم دى دماغ خربانه
كل فلوس الشعب فى جيبكم
خليتوا بلدنا عريانه
كل شويه طالع تصريح
والناس ما بقتش فهمانه
اصل كلامك دا كلام سكه
ما يجيبش ولا حتى لبانه
وانتخابات بيقولوا نزيهه
والاموات اصواتها معانا
هو احنا فى عالم تانى
ولا احنا اطفال فى حضانه
فكك منى وسسيبك منى
خلاص دماغنا بقت ورمانه
انا مش همشى غير بدماغى
دا كلام فاضى وكله اهانه
واللى انا شايفه صح هقوله
ولو مش عجبك .........مش فارقه معانا
بكره تقول ان انا ارهابى ومجرم حرب وتبقى ادانه
وتبقى محاكمه وقاضى بيحكم
طبعا اخرتنا فى زنزانة
عايز تسجن اسجن جسمى
قلبى وعقلى مش فى الخانة
علشان انا مش ناوى اسلم وناوى من النهارده ابقى رئيس جمهورية نفسى
بقلم : طه حسين عرابى