واوات الشاعر محمد الأمين خربوش
حلقات متصلة من فن الواو ...............
.............
الحلقة الخامسة ....
مع الشاعر / محمد الأمين خربوش
.....
أول ما أبدي واصلي
وأموت واحيا عشانه
طه اللي نوره وصلي
م الفجر لآخر عشانا
......
القول جمعه وحلاه
وريقه ينفع بلاسم
شوف صاحبه لما حواه
الجسم أصبح بلا سم
............
لما الرب أرسل نبيه
الأرض فرحت وطاها
والله جا فرحنا بيه
محمد وقاسم وطه
................
خلي تاكلك على الله
وارضى بقليلة حلالك
ما ف يوم تلقى علي الآه
والمر تلقاه حلا لك
...............
أقدح لقولي وأسويه
علشان يوافق مجالي
لكن يا آخي أسوي إيه
في اللي وعدني وما جالي ؟
.........
قول الكباير على الراس
واهو أمر ع الكل ينفد
طول عمري واقف وحراس
ولا كله على كله ينفد
................
يا دهر تعدل وقلاب
حتى عبيدك سادتني
أصيد السبوعه بقلاب
ألقى كلابك صادتني
............
أصول في الأرض خست
وآدي فيها كترت مشاتل
يا خلق والعبد خد ست
ومشتول حوت اللي شاتل
.......
زمن الأصالة رخى ستار
والتبن أصبح له قيمة
والحر لما رخص تار
أهو جاع ما لاقي لقيمه
........
زمن الرداوه يا مقلوب
فيك العبد فارط لباعه
وبظلمه قطع ياما قلوب
قال راح ضرب اللي باعه
.......
احنا المجالس عملنا
ورفعنا للقول شانه
ولو قل معنى عمى لنا
وفيه ناس للفظ شانو
................
فيه ناس بتلعب كنسناس
وفيه صنف آخر فطاسه
ياما الجبن فيها كنس ناس
وآدي الحر مشوي في طاسه
........
ولى مسرى وجا هاتور
رحل الشتا وجا ربيع
مات سبعنا وجاها تور
واتملت البلاد جرابيع
...........
لحم البنته يا ساتر
تشوفه يشبه مربى
والتوب عليها ما ساتر
وباين أبوها ما ربى
............
لما الحرمه طلعت ببويه
والبنت نمصت حاجبها
من غير ما احلف بابويه
العار حالف حجيبها
.........
بلا دين مالكشي نفوذ
والخطوة تحسب بدرهم
مع الرب خليك تفوز
متعرفشي إنك بدار هم
............
كتر السفاهه الحديت قب
وبالكدب نعمل جمايل
يا آخي لما يوسع القب
بتلاقي توبك جا مايل
...............
من آدم إحنا بلا اجناس
والناس رديه ببيئتها
والكون بحمله بلج ناس
والبعد م الدين باهتها
.............
مشخلع ويمشي ملولو
وبيمضغ الواد لبان
ومايع لي كيف الشلولو
يا مربي شوف اللي بان
...............
اختار لابنك ودا الساس
واعرف اللي بيردم
دا العرق يهول ودساس
جايزله يكحت بير دم
............
رضع وليدك فصيله
فضل الأصيله يضرش
والخاينه أوطى فصيله
وماعون لبنها يدرش
..................
.
رسمتك قصيدة بقوافي
وكتبت فيكي ملازم
محلاكي قلتي ابقى وافي
يا حبيبي بعدك ما لازم
.................
فيه مخ قد الفشارة
وأجسام زي الفحول
فيه ناس تفهم ف إشارة
وأهي ناس تفهم ف حول
............
مهما ان وصلت بدايات
ولابد إنت بتسعى
مش كل ولد بديات
ولا كل مولود بتسعة
............
الواو ف بيتي مربيه
وقلمي يجيبه في جره
من غير ما احلف بربيه
كيف جن حابسه في جره
...................
الندل يهينك ومجدوع
وحياؤه ميت ودفنه
يرحم أبوه اللي مات جوع
ولموله من أجل كفنه
........
في جواز بنتك بلاش عيب
بلا شبكه بلا كام حجره
شوف ياخي سيدنا شعيب
جوز بنيته بأجره
............
يا شعب مالك متهدى
آخرتها افهم دي كورة
مين في عيبك قال اهدى
هي القدس لقيت دكوره ؟
...........
معقول خلاصك على اللي
باعتين فلوسهم سويسرا
ماهو دا اللي كتر علل لي
مشايفش فيكى سوى اسرى
..............
لولا الملامة لحط طين
على راسي وامشي في ربه
طول عمري أحلم بحطين
ألقى كابوسي في أوربه
.................
تتار جونا ومغول
نهبوا البلد شطبوها
اللي قايدهم ما غول
خد شطها وشط أبوها
..............
كالكورة منك ومتشات
وزعبوله قفلت مطاره
وقاعدين بنلعب في متشات
وبقي كله يردح بطاره
................
كانت جميله فلسطين
جاها راعي لكن قلبها
وخلى عربنا الفلس طين
وع القدس شاور قلبها
..............
طويله سنة العزابات
والولد نقصوا ما زادو
وكم سنين العزا بات
والقرد فاتح مزاده
.....
هو وين عنتر يا عبله
للآن قبيلته ما عست
ماهي عبس ماتت يا هبله
وشداد قاعد مع الست
.................
ولد المحرحت جاني الدار
ولابسلي توب الشهامه
لما عرفني تاني اندار
لا وش ولا لوشي هامه
...............
جيت وسطنا وجانا بين
بقى الكلب راكب فرسنا
نابه قسناه جا نابين
والعضه جاتنا في راسنا
.........
تحية ومحبة
