الاحراز

فاكرني خايف منو .. إكمني عارف إنو .. فن التعذيب فنو
الناس خلاص اتجنو .. فرحان في البدلة اكمنو .. ماسك طبنجة في إيدو ..
القسوة جوا وريدو .. ماهو لازم يرضي سيدو .. يا ويلك لو مش هتفيدو
في المعتقلات نارو في المعتقلات حديدو .. هيقلل الفولت ولا هيزيدو
الحقد في قلبه يزيدو .. فاكر ظلمه هيفيدو ..هو فرعون والشعب عبيدو
أكيد هيكون للظلم نهاية .. جوا النت أحكي الحكاية
مهما يعذب مهما يظلم ويجرح .. كلمة الحق هي اللي هتفلح
مش هيعيشوا باستمرار .. بكرا هنصبح منهم أحرار
لو عاوزني أسكت اضربني بالنار .. مش هتخوفني لأني هاخد التار
لو هتظلمني يبقى حياتك الباقية .. لأننا شجعان دماغنا رايقة
مش هنتعذب ونموت مع خالد سعيد .. دلوقت الشباب إيد مع إيد
مافيش عندكم مفهوم الحرية .. القسوة حاجة بينكم عادية
معدل الجريمة في زيادة مستمرة .. اللي مش عاجبه يبقى يطلع يسافر برة
نمو اقتصادي وهم عايشين فيه .. الشعب مرار الفقر كمان مكفيه
مش مهم مين عذبنا أو مين سألنا .. اتعودنا الكرباج اللي يسكتنا ويعقلنا
الشوارع بقت زي الأدغال .. كدب وسرقة في كل مجال
بس الكرامة هي العلامة .. شعبنا رافض الخضوع للإهانة
كل شوية تقول لي ماتشتكيش .. إحساس الظلم مابيتحكيش .. إحساس الفقر مابينتهيش
الظلم للأسف سبقنا .. في الفقر والفساد غرقنا .. عذبنا .. دمرنا .. قلقنا
جوا المعتقلات والسجون عذبونا .. بالتعذيب والظلم والرشوة حكمونا
بنعافر عشان اللقمة مش كافية .. كمان ظلم الشرطة بطريقة جافية
انت ظابط إنسان من البشر ؟ ولا ربك خالق قلبك من الحجر ؟
الثورة صحيح خلاص انتهت .. لكن في غيرها ضد الشرطة ثورات ابتدت
ارفع راسك معايا لفوق .. لازم نكشف ظلمهم بالعافية أو بالذوق
خليك مع الحق واشترك فيها .. قوم قضي وقتك ليها .. الظلم كله هيكون مكتوب عليها
شبابنا صبحت بائسة .. من الفقر والظلم كلها يائسة
مات في الثورة كام شهيد .. لكن أصبح نعيمه جوا قبره يوم العيد
نجتمع على الظالم احنا الكل .. هيشوف العار هيشوف الذل
مش هنسكت تاني عن الحق .. هنوقع الظالم في قلب الشق
لازم نكون دايما احنا قدام .. نضرب الظالم من تحت الحزام
كل واحد عرف طريق كفاحه .. الاعتراض والثورة هي مفتاحه
أهم حاجة المسئول ينفذ بجد .. أحسن كلامي هيهد ظلمه هد
الثورات هي اللي هترجع حقنا .. الثورات اللي هتخلص عهود ظلمنا
من أبسط حقوق الإنسان .. إنه ياخد حقه لأنه مش حيوان
لما الملايين على الحق يتجمعوا .. كل الظالم وكل ظلمه هنولعوا
الثورة بنقول فيها أفكارنا كلنا .. مع الاتحاد هنرجع كل حقنا
عاوزين بقى شوية نتقدم .. عاوزين نبطل للظلم نبلع ونهضم
الثورة هنكتب فيها قضايا عصرنا .. الثورة بنرجع بيها كل حقنا
مش عايشين على الغريزة زي زمان .. مش عايشين نفس عيشة الحيوان
فاهمين إن الشباب المصري شجاع .. هيكشف ظلم الظالم على المشاع
اصحى يا عم بص في المرايا .. هتشوف أصل الظلم وقسوة النوايا
مش عايشين في وسط الضباب .. مش هنقف خايفين ورا كل باب
انت هاتختار الخير ؟ الحق ليك هايطاطي .. انت هاتختار الشر ؟ إحنا هنقول لك يا واطي
مطلوب من الثورة تكمل حتى الموت .. مطلوب نعيش بدون خوف أو سكوت
ذنبنا إيه نضيع بين الرجلين ؟ .. ليه نشوف الظلم جوا كل عين ؟
لازم الظالم يطاطي لينا لازم يسمعنا .. لازم نعيش حرية ليها معنا
الظالم دمر نفسه بإيدو .. الفساد والتعذيب مش هيفيدو
يلا هات يا مظلوم البطاقة .. هاسحب منك بالظلم رخصة السواقة
في المعتقلات يصرخ الناس .. أغيثونا .. الحقونا .. الظباط من التعذيب هيبيدونا
بص في عيون المسجون هتشوف الخوف .. أصبح التعذيب والظلم شيء مكشوف
راسك بقت تحت الرجلين .. فين أشكي الظالم ؟ أشكي تعذيبه لمين ؟
من ظلمكم بنطلع خلاص في الروح .. أصبحنا شعب منفوخ مدبوح
على الأقل هنداوي الجروح .. مكتفين بالحديد الشعب الخايف المشروخ
تلاتة في قلب الواحد .. كلمة الظلم والفساد راحت
بيت الظالم قش في ريش .. تقوى عليه الثورة يصبح مافيش
ولعت لي النار وفي الحديد أيدتني .. بالكهربا والمية والكرباج عذبتني
أسلوب عصابات ، تدمير ، إرهاب .. تعذيب في السجون والمعتقلات بدون أسباب
ثوراتي هي طريق كفاحي .. مش هموت بالتعذيب أنا لسة صاحي
زيادة في التعذيب .. غرور النفوذ .. نهب وسرقة مليارات الكنوز
أنا بني آدم وليا كل حقوقي .. هولع الثورات عشان أرجع لهدوئي
المشاعر قايدة حريقة ونار .. مش أبرد من انفجار ومرار الأسعار
ثوراتي هي سلاحي .. ثوراتي طريق كفاحي
لازم بالاتحاد والثورة ندفع التمن .. إحنا خلاص قربنا من الخوف نتعجن