البكا بعد فوات الأوان ..... شعر فنجري التايه ( أسوان )
البكا بعد فوات الأوان
فنجري التايه ( أسوان )
.....
معلشي
حقك في رقبتي
وحياة من زرته سامحني
عارف إن أنا قصرت
صهينت في حقك
حتى رحلت
لو كان الموت بينبه حد
كنت جريت
قلت لك إني خطيت
ورميت راسي عليك
وبكيت
العيب من عندي
معلشي
عارفك مش طايق وشي
فاكر الناس زي زمان
كان الصاحب صاحب
يزعل منك
وبردو يودك
دلوقتي الصاحب
صاحب نفسه
لو صدقك مرة
التانية يغشك
دلوقتي الناس
وشك وشك
دلوقتي قيمتك
مش باخلاقك
قيمتك قرشك
شفت الحال
عارفك حزنان
وحزن الدنيا ماليك
سبت الحال والمال
ورحت تقول يا فكيك
مرضوك الناس
فندهت الموت يناديك
أهو خطفك منينا وهج
ولا حد اتصدر
ولا قاله سيب الحاج
سبحان الله
أجدع راجل
قدام الموت
خواف وجبان
لو يفلت منه يوم
يخافه باقي العام
فليه الناس
تديله أمان وتنام
معلشي
كان سفرك بدري
استكترت إنك تعاتبني
قمت رحلت
وحياة رب الكعبة
إنت استعجلت
ليه ... خايف الموت
ليعدي ورقتك
رحت ندهته
كان جايلك جايلك
بس في وقته
معلشي
كان نفسي أشوفك
قبل ما تمشي
بس إنت أبيت
أتاريك صعب
كان بيني وبينك
فركة كعب
لا نطقت باسمي و لا استنيت
كنت بإيدك حتى شاشيت
وقلت مسامح
ريتك ترجع
تمسح دمعي
وننسى امبارح
...........
